قرفان , فش اشي اسويه , مع القرف قعدت احك بشعري , ايش اعمل , صرت العب فيه بتحبني ولا ما بتحبني , وأغير من تسريحته , يعني بفك زهق ..
ايش هاد ؟ شعري بيوقع , ليكون معي السرطان , يا ساتر , لا يا زلمة قول وغيّر , ولك هاد من الجل , ما هو من التسريحة الي الها سنة زي ما هي , طيب ليش ما أغير هالتسريحة ؟ انا فكرت بالموضوع بجد , بس كيف أخليه ؟ أعمله على جنب ؟ لا .. الناس بتستهبلني , وبتحكي عني أهبل .. طيب ؟
أربيه ؟ لا بصيروا يقولوا عني " فافي " ويتمقلزوا عليا , وأنا مش ناقصني مقلزة , بيكفي كلمة " تافه " الي بسمعها دايما , طيب أخليه " كوكو " ؟ بس يا اهبل , كوكو ؟ , ولك انت بغزة , بينفعش كوكو , بتصير بايع الوطن , وبتصير ملطشة لكل خلق الله , طيب أقرع مش حلو عليا , ايش اعمل ؟
خلص , خلص , خليه زي ما هو , أحسن , مش مغير فيه اشي , أنا أساسا كل ما أفكر بالموضوع بعرف انه هيأس وهاخليه زي ما هو , عشان فش جرأة عندي , لأني ببساطة هامل , حتى يوم ثورة آذار هادي الي طلعت ضد الانقسام , والقصة واللمة والهليلة الي صارت عشانها , أنا قلت لازم أروح , يعني الشباب مش أحسن مني , كلهم رايحين , وأنا ليش ما أروح ؟
صرت أتابع أخبارها أول بأول , وعملت حالي وطني , شوية شوية صرت أنزل من اليوتيوب أغاني وفيديوهات للوطن , وكل نص ساعة أفتح الفيس أشوف ازا حد حطلي " كومنت " ولا لا , فجأة صرت وطني , مش عارف ايش اعمل , صرت أستنى اليوم هادا يجي , عشان ألبس هالكوفية , وهالعلم الفلسطيني , وأنزل الجندي , وأقف مع أصحابي , والشعب يريد إنهاء الانقسام , الفكرة دخلت راسي جامد , طيب ليش ما أكون أنا واحد من الي نظموا هالمسيرة ؟ هم أحسن مني ؟ والله بعمل نهفة , بلاقي مليون " فرند ريكويست " باليوم , وبصير معروف , يمكن حتى أتوظف , بدل القعدة الي انا قاعدها بالدار , بس أنا أشد حيلي شوية , وأنزل من اليوتيوب كمان أغاني لجوليا بطرس ومارسيل , اعمل هيك , وعليا الضمان لتلاقي حالك محبوس عند حماس , وبتطلع بتصير بطل ...
لا يخو .. استنى , بديش .. , انحبس ؟ لا مش ناقصني , هو عشان أكون وطني لازم أنحبس ؟ هيني على قد حالي وماشي الحيط الحيط , أنا أصلا ماليش بالسياسة , أنا إيش دخلني ؟ أنا حتى يوم ما طلعت المسيرة أول واحد شردت , بخاف أنا يا عمي , طب والناس ؟ مش هاقولهم اني شردت , اخ هداك يوم ، روّحت على الفيس , كتبت كلمتين بسب فيها حماس انه ضربتنا , وعملت حالي شهيد وأسير وجريح , وآخ يا رجلي , وآخ يا عيني , واخ يا راسي , ها ؟ كيف بدي البنات يقولولي " سلامتك " ؟ مش لازم أعمل حالي وائل غنيم ؟ واعمل حالي انضربت ؟ هو اساسا وائل غنيم كيف انشهر غير لما انضرب ؟ بس سيبك , والله العظيم بينحسد , مين قده هلقيت , حواليه بنات خير الله , وهلقيت بيحكي باسم الشعب ..
هبل , تفاهة , قرف .. لا تتقيدوا بالمسميات , فاطلقوا بوجه هذا " المنافق " ما بحوزتكم من مسبات , هذا الشاب وبكل أسف قد نسي بأن للضمير صحوة , بات همه زائفا , ما بال العرب بتفكيرهم كدخان بلا سيجارة ؟
اعتذر منك أيها القارئ , فهذا " الغبي " حال معظم شبابنا , وبقي الحال على ما هو عليه , أنا الضمير الناطق الآن , أنا لست هو , أنا " القرف " الذي بداخله , أنا " الهبل " وأنا أتبرأ منه , وإن كانت الوطنية وهمية .
حالي كحال الخوف المزروع بكل شاب وفتاة على الوطن , شأني كشأن امرأة عجوز فقدت مفتاح بيتها فتمسكت بجذع شجرة لتحميها , آن الأوان لأستيقظ ..
فمن أنا ؟ أنا أنت وهو وهي وهم , أنا نحن , أنا كل من فكر لأجل الوطن , أنا لست ذلك " المعاق " , أنا لست مترفا ولست مكبلا , أنا وطني فلسطين , وأمي فلسطين , وبيتي فلسطين , أنا فلسطين , وأنا لها , ولست لأحد , " أنا لست لي " , أنا الباحث عن الحق , والحق فقط , أنا المبدأ , أنا الصمت الذي نطق , أنا أنت أيها القارئ , فأرجوك كف عن ما تفعل , وتيقظ لفلسطين ، ولتفعل ..
واعلم بأنها ليست من تحتاجنا , ففلسطين نحن من نحتاجها ..
يعني ضروري جدا تغير من نفسك .. علشاني قبل علشانك !
بقلم : محمد قدادة
