بشيكل ابني دولتك – مشروع جديد
هاتوا نحسبها ..
احنا اكم عددنا ؟ يعني باللغة الجغرافية .. أكم نسمة إحنا ؟ على ما أذكر وإزا ما فيش حدا نطلنا جديد من بطن إمه ، بنطلع 4.1 مليون نسمة .. هادول اللي مستويين جوة خط الشوب الفلسطيني في الضفة الغربية وقطاع غزة . تمام ، طيب خلينا نفترض إنه الأطفال اللي أقل من 16 عام بنسبة 35 % ، خليها 40 % اكم بنصير ؟ مم مش أكتر من 1.64 مليون شاب وبنت ، لو شلنا منهم 10 آلاف مواطن ، هادول طبعا الأسرى ، وعلى حسب الاحصائية اللي صارت بإنه تم اعتقال 500 أسير بعد الصفقة .. هيك أكم صرنا ؟ 1.63 مليون ، حلو كتير ..
هل تعلموا إنه إحنا قادرين نعمل اقتصاد كبير خاص فينا ، ونعمل ميزانية ضخمة لدولتنا المبجلة ، ونبني اقتصادنا بنفسنا ؟ أنا أقولكم كيف ، فتحولي " عينيكم " منيح ..
قول يخو ..
السواق لو استغنى عن شيكل واحد بس كل اسبوع ، الحلاق كذلك ، النجار ، البياع ، المكوجي ، بياع اللبن ، تاع الخضرة ، الشرطي ، أي حد ، أنا ، إنتَ ، وإنتي كمان ، وأخوكي ، واختك ، وإمك وأبوكي ، بدي بس منكم شيكل كل أسبوع ، شيكل واحد ، والله ما أنا طالب أكتر من هيك ، بتقدروا تحوشوه أغورة أغورة كل يوم ، بتقدروا تدفعوه نصين ، بتقدروا تدفعوا 4 شيكل عن شهر ، إنتوا أحرار ، المهم يكون معي شيكل كل أسبوع من كل مواطن انحسب بعد التصفية اللي عملناها توي ..
بالله برأيكم كل أسبوع أكم شيكل بنلم ؟ أنا أقولكم بنلم 1.63 شيكل ، يعني بيطلعوا تقريبا 450 ألف دولار ، يا بشر .. 450 ألف دولار بأسبوع .. احسبوها معي بتطلع بالشهر 1.8 مليون دولار ..
لحتى الآن أنا وصلت نص فكرتي ، مع إني مش محاسب ، ولسة بكره المحاسبة والحسابات والرياضيات ، بس لو جبنا الناس اللي تحت خط الفقر ، بالاحصائية الجديدة انحسبت على انها 34 % من الأسر الفلسطينية ، وأنا بدي أكون كريم معكم وأخليها 40 % يعني أكم مواطن ؟ نحسبها تاني .. ( 1.64 / 40 ) * 100 = 656 ألف مواطن ماكل هوا بحياته وعايش على الأسفلت .
الفكرة كاملة الله يرضى عليك ..
الفكرة .. نقسّم ال1.8 مليون دولار على الناس هادي بالتساوي ، وبحق الله ، وبالشرع والدين .. يعني بيطلع لكل مواطن 2.74 ألف دولار أمريكي كل شهر ، ديروا بالكم ، هادي لكل مواطن مش لكل أسرة ، لو فرضنا إنه الأسرة مكونة من الأب والأم والإبن والبنت يعني بيطلعلهم 11 ألف دولار شهريا . طب عليا الضمان أكتر من راتب أبو مازن بالشهر .
طيب بعد ما نقضي على الأسر الفقيرة ، ويزيد عنا فائض مصاري من لملمة الشواكل بالشارع ، إيش هنعمل ؟ هنضل نعطي الأسرة الفقيرة هيك ؟ .. لا . فيه أولويات بتيجي وراها ، وفيه السلم الحياتي اللي الشعب كله متشعلق فيه ، بما إنه ما حدّش اتضرر من هالشيكل ، بس يمكن جارتك تقول إيشمعنى هي صار معها مصاري وأنا بدفع زيي زيها وما أخدتش إشي ، هاجي أقولك ، صبرا آل ياسر ، ما حدش بيضيع حقه عنا بهالدولة ، كله هياخد نصيبه .
تمام ، وبعدين ؟
عملنا اللي علينا وطمّينا إحصائية سنة 2011 بخط الفقر ، نيجي على خط البطالة اللي ولا بد إنها تكون متداخلة بخط الفقر ، الإحصائية برضه بتقول إنه 16.5 % من الشباب الفلسطيني عاطل عن العمل في قطاع غزة ، و 34 % عاطل عن العمل في الضفة الغربية ، المجموع الكلي لإلهم 40.5 % ، هادول كمان بيطلعلهم حاجة من اللي خلينا نسميه " تقبيض شهري " ؟ ، وليش لا ؟ بس إحنا بدناش نعوّد الشباب على القعدة وخلص ، ما هو لو فكرنا فيها ، هنلاقي إنه تلقائي اللي صار كالتالي ، شركات بتنفتح ، طلبات التوظيف بتزيد ، البطالة بتتناقص تدريجيا ، شوية شوية ، على حساب إنه خط الفقر بدا يتلاشى ، لهيك العلاقة الطردية بتلعب دورها بتلاشي الضعف الاقتصادي اللي بيعاني منه الشعب ، وهيك خط الانتاج بيتجه بالضرورة والزنقة للأعلى ، هينا كمان زنقنا خط الإنتاج ، برضه تخيلوا لو مشينا على الموضوع هاد سنة زمان ..
ال1.8 في السنة اللي جمعناها بيصيروا 21.6 مليون دولار ، شوفوا أكم مؤسسة بتبني ، شوفوا أكم شركة ، أكم مركز ، أكم محل ، أكم مصنع ، أكم مدرسة ، أكم مستشفى ، ب10 سنين بس ، والله لتصير دولتنا عالم تاني ، وهنبطل نشحت الدعم اللي بيجينا من شوية " الهلافيت " الأوروبيين ، والدول المانحة ، هيصير تصنيفنا " الدول النامية " مؤقتا وشوية شوية هنصير من الدول المصدرة للبترول ، ومش بعيد كمان نصير دولة بنهدد بالنووي ، وعلى فكرة ، هادا كله هيأثر على مستوى التعليم ، مستوى الابداع ، مستوى الثقافة ، الطب ، البنيان ، الزراعة ، كل اشي ، لانه طبيعي جدا إنه طالما التكلفة أو رأس المال مرتفع فالجودة طرديا هترتفع ، وهيك أي حد بيكون عنده فكرة إبداع لشغلة براسه ، مش هيستنى الدعم ، أو الNGO'S تيجي تدرس المشروع ، وتنفذه ، مش هتلاقي أساسا المؤسسات هاي .. يمكن احنا منا وفينا نصير ندفعلها .. " طب والله العظيم إنها فكرة حلوة " .. محتاجة بس خزنة ومبنى تحت مسمى " وزارة التقبيض الشهري " ..
يا وردي عليا أنا ، كل هادا بشيكل كل أسبوع ؟ طيب تخيلوا لو كل أسبوع أخدنا 2 شيكل ؟ .. مش هاقول عاللي هيصير .. احسبوها براحتكم ..
خَيْ .. ببطّل أسافر !
بالنهاية هاقول حاجة صغيرة .. إنتوا ملاحظين إنه الحكومة الفلسطينية سواء بالضفة أو بغزة بتاخد أضعاف المبلغ هادا كل شهر منكم ؟ على أساس إنه العائد الأول والأخير إلكم ؟ فكروا فيها منيح واسألوا الحكومة ، إنه مادام الشيكل كل أسبوع بيعمل كل هادا ، أنا وين مصاريا بتروح ؟ ليش السواق يقاتلني على نص شيكل بالتسعيرة الجديدة ؟ ليش أشوف الحجة بتطاوش بياع الخضرة علشان هو أغلى من جاره ؟ ليش أنا معيش أشتري دوا الكحة علشاني مفلوز ؟ وليش إنت قاعد على الفيسبوك أو بتقرا مجلة بدل ما تكون ورا مكتب وبتشتغل ؟
..
..
وليش بالنهاية أنا كاتب الإشي هادا ؟ وليش انا واجع راسي من الأول ؟ ..
دخيلكم بس ، حد يداينني 2 شيكل مواصلات .. ووعد أول ما تنزل القبضة هاسده إيّاهم ..
مش عارف إزا هادا مشروع واحد مفلس ؟ ولا هي مجرد تساؤل عن حقنا الضايع ..
محمد قدادة
ليست هناك تعليقات:
إرسال تعليق